एथलेटिको मड्रिड छाड्ने फ्रान्सेली स्ट्राइकर एन्टोनी ग्रिजम्यानकाे घोषणा


१ जेठ, काठमाडौं । ला लागिअन्तर्गत आगामी शनिबार लेभान्टेसँगको खेलपछि विश्व विजेता फ्रान्सेली स्ट्राइकर एन्टोनी ग्रिजम्यानले एथलेटिको मड्रिड क्लब छाड्ने घोषणा गरेका छन् ।

२८ वर्षीय ग्रिजम्यानले ट्वीटरमा एक भिडियो पोष्ट गर्दै उनले अरु कुरा हेर्न र अरु चुनौती लिन यो क्लब छाड्न लागेको बताएका छन् । मड्रिड छाड्ने निर्णय गर्न गाह्राे भएपनि छाड्नु नै उचित लागेकेा पनि भनेका छन् ।
ग्रिजम्यान रियल सोसिडाडबाट सन् २०१४ मा एथ्लेटिको मड्रिडमा आएका थिए । यो पाँच वर्षको अवधिमा उनले अहिलेसम्म एथ्लेटिको मड्रिडका लागि २५६ खेल खेलेका छन् र १३३ गोल गरेका छन् । उनी पछिल्ला पाँच सिजनमा क्लबका सर्वाधिक गोलकर्ता हुन् । उनले युरोपा लिग, स्पेनिस सुपर कप र युइएफए सुपरकप पनि जिताएका छन् ।

पाँच वर्ष एथलेटिको मड्रिडमा बिताएपछि गत वर्ष जुन महिनामा उनले फेरि सम्झौता नवीकरण गरेका थिए । तर, उनले बीचमै क्लब छाड्ने घोषणा गरेपछि उनको अन्तर्राष्ट्रिय फुटबल जगतमा चर्चा भइरहेको छ ।

एथलेटिको मड्रिड छाडेर उनी बार्सिलोनामा जान सक्ने चर्चा सुरू भएकाे छ । गत वर्ष नै बार्सिलोनाले उनलाई भित्राउन खोजेको थियो । तर, त्यतिबेला उनले अस्वीकार गरेका थिए । उनलाई भित्राउन चाहने क्लबले एथलेटिको मड्रिडलाई कम्तिमा १२० मिलियन युरो तिर्नुपर्ने बीबीसीले लेखेको छ ।

यो समर सिजनमा एथलेटिको मड्रिड छाड्न लागेका ग्रिजम्यान तेस्रो हाईप्रोफाइल खेलाडी हुन् । यसअघि डिफेन्डर लुकास हर्नान्डेजले वायर्न म्युनिख जान सहमति जनाएका थिए । साथै लामो समयको सेवापछि कप्तान डिएगो गोडिनले पनि एथलेटिको मड्रिड छाड्ने घोषणा गरेका छन्

बुध, जेष्ठ १, २०७६ मा प्रकाशित

यसमा तपाइको प्रतिक्रिया