खड्ग जोगीलाई नेपाल फर्काउन मलेसियाबाट ४ लाख सहयोग


तेह्रथुम । युएईको जेलमा रहेका तेह्रथुमको फेदाप गाउँपालिका–२, ओयाक्जुङका खड्गबहादुर जोगीलाई नेपाल फर्काउन तेह्रथुम-मलेसिया सम्पर्क मञ्चले ४ लाख रुपैयाँ सहयोग गरेको छ ।

मञ्चले मलेसियामा संकलन गरेकोे ४ लाख ६० रुपैयाँ रकम जोगीको परिवारलाई हस्तान्तरण गरेको हो ।

घर फर्काउ अभियानमार्फत संकलन गरेको रकम मञ्चले परिवारलाई उपलब्ध गराएको फेदाप गाउँपालिका–२ का वडाध्यक्ष गोविन्द मादेम्बाले जानकारी दिए ।

मादेम्बाको अगुवाइमा संकलन भएको ६४ हजार १ सय रुपैयाँसमेत परिवारलाई हस्तान्तरण गरिएको छ ।

२०७० सालमा युएई गएका जोगी फिलिपिनी नागरिकको हत्या आरोपमा चार वर्षदेखि जेल सजाय भोगिरहेका छन् ।

खड्गबहादुरलाई अदालतले ५ वर्ष कैद र दुई लाख दिर्हाम जरिवाना तिर्नुपर्ने फैसला गरेको छ । जोगी अहिले युएईको आबुधावीमा रहेको अलवात्बा जेलमा छन् ।

जोगीलाई नेपाल फर्काउन आवश्यक ६२ लाख रुपैयाँ जुटाउन देश विदेशमा अभियान चलेको छ ।

अहिलेसम्म आवश्यक रकम जम्मा भइसकेको खड्गबहादुर जोगी बचाऊ अभियानका अध्यक्ष दुर्गा गिरीले बताए ।

बिहि, पुस २६, २०७५ मा प्रकाशित

यसमा तपाइको प्रतिक्रिया