मंसिरको चुनाव हुन नदिन पर्दापछाडिको खेल सुरु

इटहरी, २८ भदौ । नेकपा एमालेका उपमहासचिव विष्णुप्रसाद पौडेलले आगामी मंसिरमा संघ र प्रदेशको चुनाव हुन नदिन पर्दा पछाडिबाट विभिन्न प्रकारका षड्यन्त्रका खेल भइरहेको बताउनु भएको छ ।

नेता पौडेलले आज इटहरी उपमहानगरपालिका– १० मा निर्माण गरिएको फुटसल खेल मैदानको उद्घाटनपछि देशमा संवैधानिक रिक्तता ल्याएर अस्थिरता पैदा गर्न खोज्ने षड्यन्त्रका विरुद्ध सबैले मिलेर पर्दाफास गर्न जरुरी रहेकामा जोड दिनुभयो ।

उहाँले अब सबै नेपाली मिलेर संविधानका पूर्ण कार्यान्वयनसँगै देशलाई समृद्ध पार्ने साझा अभियानमा एक ढिक्का भएर अघि बढ्न जरुरी रहेकोमा जोड दिनुभयो ।

पूर्व युवा, खेलकुद तथा संस्कृतिमन्त्री पौडेलले नेपालको समग्र विकासका लागि खेल क्षेत्र महत्वपूर्ण भए पनि अझै सरकारले खेल क्षेत्रतर्फ पर्याप्त लगानी गर्न नसकेको धारणा राख्नुभयो ।

नेपाली खेलाडीले नेपालको गौरव राख्दै नेपालीका शिर उठाउने काम गरिरहेकाले तिनको सम्मान गर्नुपर्नेमा उहाँको जोड छ ।

बुध, भदौ २८, २०७४ मा प्रकाशित

यसमा तपाइको प्रतिक्रिया