अखिल क्रान्तिकारीको अध्यक्षमा रन्जित तामाङ


काठमाडौ १७ भदौ ।
माओवादी केन्द्र निकट विद्यार्थी संगठन अखिल क्रान्तिकारीको अध्यक्षमा रन्जित तामाङ विजयी हुनु भएको छ । २१ औं राष्ट्रिय सम्मेलन अन्तरगत बिहिबार भएको निर्वाचनमा प्रतिद्धन्द्धी अनिल शर्मालाई पराजित गर्दै तामाङ विजयी हुनु भएको हो ।

निर्वाचनको औपचारिक घोषणा भने हुन बाँकी छ । संगठनको अधिकांश पदमा पनि तामाङ प्यानलका नै विजयी भएका छन् । उपाध्यक्षमा खुला तर्फ सुरेन्द्र बस्नेत, तिलकराज भण्डारी, विजयी गौतम र दिपक देवकोटा विजयी भएका छन् ।

यसैगरी महिला खुला उपाध्यक्षमा पन्चासिंह निर्वाचित हुनु भएको छ । यसैगरी जनजाति तर्फ उपाध्यक्षमा दिपेश पुन र मधेशी उपाध्यक्षमा रविकिरण यादव विजयी भएको छ । महासचिवमा खिमबहादुर सिंहलाई पराजित गर्दै उत्तम अधिकारी विजयी हुनु भएको छ ।

यसैगरी उपमहासचिवमा जीपी मैनाली र तुकमान महरा तथा महिला उपसचिवमा आशा तमु चुनिनु भएको छ । संगठनको कोषाध्यक्षमा केशव रावल र खुला सचिवमा डिबी साउद र नरेश रेग्मी तथा महिला सचिवमा गंगा दाहाल विजयी भएका छन् ।

नेतृत्व चयनसँगै गत भदौ ७ गतेदेखि सुरु भएको अखिल क्रान्तिकारीको सम्मेलन सकिएको छ । सहमतीय प्रक्रियाबाट नेतृत्व चयन गर्न नसिकएपछि पहिलो पटक निर्वाचन मार्फत संगठनको नेतृत्व चयन गरेको हो । सम्मेलनको निर्णय आजै पत्रकार सम्मेलन मार्फत जानकारी गराइने बताइएको छ ।

शनि, भदौ १७, २०७४ मा प्रकाशित

यसमा तपाइको प्रतिक्रिया